العالم المزيف
السلام عليكم و رحمة الله و بركاته
حقيقة انا مش عامل البوست دي عشان اعرف قد اية انا باعرف اتفلسف و اقول كلام كبير .. انما عشان اتكلم عن حاجة انا حاسس انها متكبرة و الي حد ما مزيفة .. الحاجة دي و ياللغرابة هي كل حاجة احنا بنعملها …
كمان البوست دي بتشرح فكرتي بمثال عن الحب – اللي مش هو موضوع البوست علي فكرة – و لكن لقيته مناسب جدا
استوقفني كلام البرت اينشتاين عن نسبيته حينما قال
- بين الماضي والحاضر والمستقبل ليس هناك سوى وهم في تفكير العقل البشري..إذا لاحظتم أن – الأوقات الحزينة نشعر بها انها طويلة بينما الايام الفرحة تمر كالدقيقة- وهذه هي النسبية.
الكلام دة صادف اتجاه كنت بافكر فيه و هو هل مشاعرنا اللي في الواقع بتحدد طريقنا في الحياة حقيقية ( انا اؤمن تماما بان كل شيء مقدر ) يعني هل احنا محتاجين للحب مثلا كل الحاجة دي لدرجة ان جميع انتاجنا الغنائي مثلا بيتكلم عن الحب و تلات ارباع الصور الشخصية علي الفيس بوك صور رومانسية و لا الحقيقة ان الحب دة هو الحاجة اللي بنصبر نفسنا بيها لحد ما ندخل في مرحلة تانية من حياتنا ؟ هل احنا شايفين ان الحب هو المخلص من اوقات الفراغ ؟
طب تحب اقولها لك بشكل اوضح اكتر .. هل في حب بين الرجل و المرأة اصلا و لا كل طرف عاوز التاني لمجرد الاحساس بالثقة .. انا راجل و كبرت و في بنات معجبة بي كمان و دة دليل علي اني متميز عن غيري من الناس اللي مش معجبة بيهم واحدة؟
يمكن يكون من الادلة علي وهمية الحب هي ان الواحد ممكن يكون بيحب في قصة حب و في نفس الوقت بيفرح بكلام الثناء و المديح اللي بيلاقيه من بنات تانيين , لا و يفكر فيهم كمان طب لية ؟؟
عشان البنت اللي مدحته ادته اللي هو محتاجه الثقة …
المشكلة الحقيقية اننا لما بتغيب عننا حاجة لفترة و نسمع كلمة عنها بنخليها كلمة و نص و نديها لواحد تاني يخليها كلمتين و تالت تلات كلمات لحد ما توصل لمسكين و هي قد الفيل و ما يلاقيش قدامه اي حل الا انه يصدق الوهم اللي مصدقينه كل اللي حواليه
انا مش عامل البوست برضة عشان اتكلم عن الحب انا اخدت دة كمثال … هل الحاجات اللي بنشعر بيها اصلا حقيقية و لا احنا اللي بنوهم نفسنا ؟؟
ازاي يا عم اومال فين الاخلاص في الحب ؟
الاخلاص في الحب ما هو الا احساس بيمنعك انك تعمل الغلط ( اللي هو الخيانة ) زي ما بالظبط بيمنعك بتمنعك امانتك انك تسرق انما انت مش بتخلص عشان بتحب … للاسف احنا بنخلص عشان ما يبقاش شكلنا وحش قدام نفسنا .. حاجة زي الضمير كدا
في المحصلة كلامي طبعا ممكن يكون غلط في غلط و لكن دي خلاصة تجربة طويلة و تفكير كتير انا اول واحد يتمني انه ما يكونش صحيح لان بكدا الدنيا حوالينا هاتبقي مادية جدااا .. انا باعمل كذا عشان كذا و لو المقابل راح هابطل اعمل
جااااااااااااااااااااامد جداااااااااااا يا عم مصر
وبالذات
(يعني هل احنا محتاجين للحب مثلا كل الحاجة دي و لا الحقيقة ان الحب دة هو الحاجة اللي بنصبر نفسنا بيها لحد ما ندخل في مرحلة تانية من حياتنا ؟ هل احنا )
بردو الجزء دا عجبنى
(المشكلة الحقيقية اننا لما بتغيب عننا حاجة لفترة و نسمع كلمة عنها بنخليها كلمة و نص و نديها لواحد تاني يخليها كلمتين و تالت تلات كلمات لحد ما توصل لمسكين و هي قد الفيل و ما يلاقيش قدامه اي حل الا انه يصدق الوهم اللي مصدقينه كل اللي حواليه)
بس مش عارفه ايه علاقته باللى قبله!!
لا دة علاقته مش باللي قبله
انا باتكلم عموما عن الحاجات اللي بنوهم نفسنا بيها مش بس الحب
يعني مثلا مصطفي محمود لما غاب عن الاضواء و فجأة رجع تاني بعد وفاته تلاقي الناس تهتم بيه جداا و تزودها قوي في المبالغة في عبقريته اللي مش باقلل منها علي فكرة
كذلك الحب … من الفين سنة كدا واحد اتكلم مع واحد عن الحب و شوقه له و دة راح نقلها لواحد تاني و تالت و مليون لحد ما بقي الاسطورة اللي احنا عايشين تبعاتها دلوقتي .. الحب هو الروح و الحياة و احسن ما في الوجود و و و و
بس
امممممممم
كلام منظقى بردو